Completada a matinal da segunda etapa pouco cambiaron as cousas na cabeza desta 54 edición do Rallye de Ferrol. Ao seu e con ritmo imperturbable, Víctor Senra e David Vázquez marcaron senllos scratchs nas pasadas por Irixoa – Monfero e Monfero – Monfero, ampliando a súa vantaxe ata os case 4 minutos sobre Roberto Blach e Mauro Barreiro. A matinal arrincou con ceos cubertos e humidades en zonas concretas de ambas as especiais que provocaron máis sustos que consecuencias nos cronos dos equipos que ocupan a parte alta da táboa.
Blach afiánzase na segunda posición, tendo en conta que os problemas de freos no Yaris GR de Dani Berdomás repetíronse, como na etapa de onte. As diferenzas entre ambos os equipos amplíanse ata os 56” polo que, a falta dun tramo o do Festa Rally3 tería asegurada a segunda praza, mentres que Berdomás ten por detrás a Antón Pérez Orozco a só 11 segundos. O podio aínda pode cambiar.
Tras eles, Pablo Rey ampla ata os 15 segundos a súa vantaxe sobre Dario Calviño; Antonio Fernández xa se deixa un minuto con estes dous equipos, mentres Vinyes segue marcando segundos mellores cronos nas especiais, por detrás de Senra, e ascendendo xa á oitava posición, a 25” do Mitsubishi Evo X. Gabriel Rodríguez Gándara e Álvaro Cerqueiras seguen mandando entre os Clio Trophy, deixando practicamente sentenciada a vitoria de non mediar problema algún na última especial prevista para esta xornada.
